شيرين :“أنا الفترة اللي فاتت كنت تعبانة جدًا وحاسة إني بغرق، وكنت محتاجة أبعد شوية عشان أعرف أرجع تاني”

كشفت الفنانة شيرين عبد الوهاب تفاصيل أزمتها الأخيرة وكواليس عودتها إلى الغناء، خلال مداخلة هاتفية مع عمرو أديب في برنامج “الحكاية”.

وقالت شيرين: “أنا الفترة اللي فاتت كنت تعبانة جدًا وحاسة إني بغرق، وكنت محتاجة أبعد شوية عشان أعرف أرجع تاني.. دلوقتي أنا كويسة جدًا نفسيًا وحاسة إني رجعت للحياة من جديد”، مؤكدة أنها تعيش حالة من السعادة مع عودتها للغناء وتفاعل الجمهور معها.

وعن كواليس دخولها الاستوديو مجددًا، أوضحت: “أول ما دخلت كنت متوترة جدًا، قلبي كان بيدق بسرعة وإيدي كانت ساقعة، بس غمضت عيني وسجلت.. والحمد لله عرفت أرجع”، مشيرة إلى نيتها طرح أغنيات جديدة بشكل متواصل، إلى جانب ديو مرتقب مع محمد حماقي.

كما وجهت رسالة دعم إلى الفنان هاني شاكر بعد أزمته الصحية، قائلة: “ألف سلامة عليك، ترجعلنا بالسلامة وبخير.. إن شاء الله كبوة وتعدي وربنا معاك”.

وحرصت كذلك على توجيه الشكر لكل من ساندها في أزمتها، وقالت: “زينة كانت بتراعي أولادي، وعزيز الشافعي كان سند كبير ليا… ودعوات الناس هما اللي وقفوني على رجلي”، مؤكدة أن الدعم الذي تلقته كان حاسمًا في تجاوز هذه المرحلة.

وأضافت في رسالة إنسانية: “لو تعرفوا قيمة السرير اللي بتناموا عليه… كل دي نعم إحنا مش حاسين بيها”، في إشارة إلى ما خرجت به من مراجعات بعد التجربة.

كما كشفت عن فترة علاجها قائلة: “أنا كنت في مكان بعيد شوية بحاول أبعد عن أي ضغط أو أخبار… وحاسة إني اتولدت من جديد”.